مراجعه منتج
ماتحكمش على الكتاب من غلافه, بالمنطق ده فبوست انهارده بعنوان ما تشتريش المنتجات المكتوب عليها أنها منتجات دايت أو طبيعية أو صحية و تسلم و تغمض عنيك ..
وده مثال للحالات دي .. مكرونة بدقيق الشوفان الصحية (لايت).
على العلبة مكتوب (مكرونة صحية أكتر) الاسم شدني جدا وقررت اجربها..
–السعر: العبوة 400 جرام سعرها 25 جنية (المكرونة العادية نفس الحجم و يتراوح سعرها من 6-9 جنية)
محاولتش ابص خالص للأسف علي المعلومات الغذائية المدونة على العبوة اعتمدت على معلوماتي إن دقيق الشوفان في نشويات أقل، بروتين آكتر وألياف آكتر من دقيق السيمولينا (إللي بيتعمل منه المكرونة العادية).
–الطعم: طبخت المكرونة وحقيقي طعمها لطيف مش مختلف كتير عن المكرونة العادية هييييه يلا بقى أصور المنتج والمعلومات الغذائية وأزف البشرى للناس.
وهنا أنا الحقيقة اتصدمت..
–البروتين :المكرونة خليط من دقيق السيمولينا ودقيق الشوفان لكن للغرابة إن البروتين أقل !
آه مش أقل كتير(12 جرام ف ال 100 جرام مكرونة مقابل 12.5 جرام للمكرونة العادية) لكن برضه أقل ودي حاجة أنا مش فاهماها خالص!، لأن دقيق الشوفان بروتينه آعلى ف إزاي الخليط يكون بروتينه أقل؟!.
–النشويات: النشويات أقل طبعا ف المكرونة بالشوفان بس برضه مش فرق يعني 70 جرام مقابل 73 جرام!.
–الدهون: مكرونة الشوفان فيها دهون أعلي لأن دقيق الشوفان فيه دهون آكتر.
–الألياف: ايوة صحيح الالياف آكتر ف مكرونة الشوفان 3 جرام مقابل 0،4 جرام.
–الفيتامينات و المعادن:المكرونة العادية فيها كالسيوم وحديد, مكرونة الشوفان كله صفر.
–السعرات الحرارية:المفاجأه بقى أن كالوريز مكرونة الشوفان أعلي (بالنسبة لي ده إسمه موت وخراب ديار) 361 مقابل 345.
فالحقيقة أنا مش عارفة ايه اللي يخليني اشتري المنتج الأغلى, و مش عارفة ليه مكتوب عليه لايت يعني أخف مقارنة بايه؟!
و لو على ال 2.6 جرام الياف الفرق دول ممكن نعوضهم بنص كوباية بروكلي أو جزر أو حبة خيار كبيرة !
كان نفسي الريفيو يخلص لحد كده لكن دول كمان حاسبين الكالوريز علي ال nutrition facts غلط!
–لل100 جرام من المنتج:
المفروض 12 جرام بروتين = 48 كالوريز.
70 جرام نشويات نشيل منهم 3 جرام الياف (نشويات مش بتتهضم) يبقى عندنا 67 جرام نشويات صافية = 268 كالوريز.
3 جرام دهون = 27 كالوريز.
48 + 264 + 27 = 343 كالوريز.
يبقى ايه الخلاصة, الخلاصة أنك تفكك من وش العلبة المتزوق الشيك اللي مكتوب عليه دايت, و تقلب العلبة و تطلع نضارتك و تقرا ال nutrition factsبدل ما تدفع 3 أضعاف التمن و في الحالة دي تقريبا كمان في فايدة أقل!