هو-مفيش-فرى-في-الكيتو-؟-خااااالص-يعنى؟
مفيش كلام كتير مكتوب عن الفري.. فاللى أنا كاتباه ده اجتهادات شخصية من قرايات كتير أوى ومن تجارب شغلي.
طيب عشان ناخد فرى مش قبل أول 6 – 8 اسابيع (لأن أصلاً إحنا أما نبتدي بنقعد من أسبوعين لـ 6 أسابيع عشان الجسم يكون (fat adapted) .. أنا مش حرجح أول فرى قبل 6 اسابيع بأى حال وممكن بعد كده يكون فى فري كل 3 أسابيع أو شهر.
الحقيقة آخر اهتماماتى هو الوزن للى حتزيده بعد الفرى.. عشان الوزن ده معظمه حيكون مياه فمش دى المشكلة خااااالص.
Rule 1
بلاش تأنيب ضمير..
كلت؟ .. يلا نشوف فين المشاكل ونحلها إزاي.
طيب فين المشكلة؟المشكلة انك حتخرج من الكيتوسيز أول ما تاكل النشويات الجسم حيبتدى يستخدمها كمصدر للطاقة.
الناس اللى عندها سكر ركزوا فى جرعات الأدوية عشان سكركم حيعلى مرة واحدة.
طيب هو عشان نرجع كيتوزيز بعد الفري حناخد 48 لـ 72 ساعة ولحد أسبوع (الموضوع بيعتمد على حرق الجسم والسن ودرجة العك في الفرى)
ممكن تلاقى نفسك تانى بتعانى من أعراض كيتو فلو.. ونرجع تانى للcraves بتاعت الحلويات وشوية انتفاخ عشان بتهضم وبتتعامل مع كمية نشويات وسكريات جسمك أصلاً نسيها.
نصلح العك ده ازاى؟– صيام متقطع (13-18 ساعة بعد الوجبة) عشان تحرق الجلايكوجين اللى اتخزن .. ده زرار الستارت بتاعنا… فرى يعنى صيام مفيهاش فصال دي.
– 20% كالوريز أقل من اللى انت بتاخدها.
– أول وجبة بعد الصيام تكون وجبة غنية بالدهون وقلل الكاربز جدااااااا، لو تقدر تعمل كارنيفور يومين تبقى هايل أو أضعف الإيمان كيتو كلاسيك.
– عيد تانى صيام ودهون كتير وكاربز قليلة أوووووووى.
– مياه كتير(شوربة العضم أو شوربة فراخ عشان المعادن)
– أما تجوع كل دهون.
– رياضة كارديو ويا سلام لو وانت صايم.
– خل تفاح وليمون على مياه حيساعدك ترجع أسرع.
آه.. فري وجبة .. مش يوم لو سمحتوا