10 معتقدات غذائيه خاطئه عند مريض السكر
10 معتقدات غذائية خاطئة عند مريض السكر
يوافق يوم 14 نوفمبر اليوم العالمى لمرض السكر، الأرقام التقديرية للأشخاص المصابين بمرض السكري أعمارهم تتراوح بين (٢٠–٧٩ سنة)،
يبلغ عدد المصابين بمرض السكري حول العالم عام ٢٠١٥ (٤١٥ مليون شخص) ومن المحتمل أن يصل عدد المصابين إلى (٦٤٢ مليون شخص) عام ٢٠٤٠
يبلغ عدد المصابين في منطقتي الشرق الأوسط وشمال إفريقيا عام ٢٠١٥ (٣٥.٤ مليون شخص)، ومن المتوقع أن يرتفع الرقم ليصل إلى (٧٢.١ مليون شخص) عام ٢٠٤٠
مفيش بيت يخلو من مريض سكر وللأسف مرض السكر بيأثر على كل خلايا الجسم وافضل الطرق لتجنبه هو اتباع نمط حياة صحى
وشعار اليوم السنة دى كان #عيون_على_مرض_السكر رسالة للتوعية والكشف المبكر عن مضاعفات مرض السكر، وبما ان الغذاء الصحى ركن اساسى في علاج مريض السكر حنصحح اكتر 10 مفاهيم خاطئة عن تغذية مرضى السكر
✘ الفاكهة صحية وينفع ناكل منها بأى كمية
✔ الفاكهة تحتوى على نشويات في صورة سكريات طبيعية والياف، الحصص المسموحة للفاكهة من 2-4 حصص في اليوم وتجاوز الحصة دى يؤدى لارتفاع مستوى السكر في الدم
مهم جدا ناكل فاكهة عشان غنية بالالياف، مضادات الاكسدة والفيتامينات لكن ناكل باعتدال
(حصة الفاكهة هي ثمرة فاكهة متوسطة الحجم)
✘ عصير الفاكهة الخالى من السكر صحى ويتاخد في اى وقت
✔ العصير لا يحتوى على الياف، يحتوى فقط على سكريات بسيطة بيرفع السكر في الدم اسرع من ثمرة الفاكهة
كوب العصير فيه اكتر من ثمرة فاكهة
الأفضل اكل الفاكهة مع قشرها
✘ مريض السكر له اكل خاص (موجود على الارفف في السوبر ماركت منتجات خاصة بمرضى السكر)
✔ مريض السكر ياكل نفس اكل الشخص الطبيعي لكن الفرق بان النشويات تكون محسوبة ومناسبة على حسب جرعات الانسولين او الادوية اليومية
✘ اهم حاجة اخد بالى ومكترش من النشويات واكل بروتين ودهون براحتى
✔ مريض السكر لازم ياكل غذاء صحى متوازن
الاكثار من الدهون ممكن يسبب زيادة في الكوليسترول الضار والدهون الثلاثية ويسبب ارتفاع في ضغط الدم ودهون على الكبد وامراض القلب والشرايين
البروتينات الحمرا دهونها كتير، ولازم نراعى كمية البروتين برضه عشان منجهدش الكلى خاصة ان مرضى السكر عرضة للإصابة بقصور في وظائف الكلى
✘ ممنوع تقرب ناحية الحلويات خالص
✔ قطعة حلويات صغيرة ومحسوبة ضمن السعرات الحرارية مش حتضر المهم نبقى واخدين بالنا من نسبة السكر في الدم
✘ ممكن اكل عيش ريجيم زى م انا عايز المهم ابعد عن العيش الأبيض
✔ العيش الأبيض والعيش الأسمر الاتنين فيهم نغس السعرات الحرارية الفرق في نسبة الالياف ف حصة العيش حتكون واحدة
✘ ممكن اخد عسل اصله مختلف عن السكر
✔ العسل يحتوى على سكريات بسيطة وسعراته متفرقش عن سعرات السكر خالص
ناخد العسل فقط في حالات انخفاض مستوى السكر في الدم
يجب تجنب استخدام السكر والعسل او استبدالهم بمحليات مصطنعة
✘ كل ما قللت الوجبات قدرت اتحكم في مستوى السكر
✔ على الأقل 5 -6 وجبات في اليوم منهم 2 او 3 وجبات بينية خفيفة، قبل النوم مباشرة ممكن وجبة خفيفة تحتوى على نشويات معقدة لمنع هبوط السكر اثناء النوم خاصة للمرضى المعتمدين على الانسولين
✘ الرياضة بتعمل هبوط مقدرش امارسها
✔ الرياضة بتساعد على الحفاظ على مستوى السكر في الدم، قبل بداية التمرين يجب قياس نسبة السكر في الدم وتناول وجبة خفيفة تحتوى على نشويات نوعها وكميتها تتحدد حسب مستوى السكر في الدم، نوع وحدة الرياضة
الرياضة قبل النوم بتقلل نسبة السكر في الدم اثناء النوم
✘ اما بحس بهبوط باخد حتة شيكولاته
✔ الشكولاتة تحتوى على دهون بتقلل سرعة امتصاص السكر
عند حدوث هبوط تناول عصير، عسل، سكر او أقراص الجلوكوز
الاعتدال والتنوع في الاكل، تبنى نمط حياة صحى (اكل صحى، رياضة، مفيش تدخين) والالتزام بالعلاج والمتابعة الدورية بتقلل عبء المرض وتحد من مضاعفاته #عيون_على_مرض_السكر